Од 6 февруари до 22 март 2026 година, по благослов на Неговата Светост Патријархот Московски и на сета Рус Кирил, во Москва, ќе се одржи изложба на манастирот „Света Елисавета“, од градот Минск во Белорусија. Проектот се реализира со поддршка на Амбасадата на Република Белорусија во Руската Федерација.
Експозицијата „Пролет на светлината“ ќе биде претставена во Националниот павилјон на Република Белорусија (павилјон бр. 18). Духовно-просветниот проект е посветен на осмислувањето на Великиот пост како време на внатрешен духовен труд, очистување на срцето и надеж за Воскресението Христово.
Во рамките на изложбата, на посетителите ќе им бидат претставени шест тематски витрини и експозиција кои последователно ја откриваат содржината на неделите од Великиот пост и водат кон празникот Пасха Христова. Во централниот дел на павилјонот ќе биде уреден параклис — молитвен простор, каде што оние што ќе посакаат ќе можат да застанат за молитва и да остават молитвени ливчиња.
Посебно внимание е посветено на работата со децата. За најмладите посетители ќе функционира детска гостинска просторија, во која ќе се одржуваат претстави на куклениот театар „Батлејка“, а организаторите ќе понудат и креативни работилници посветени на темите на семејството, добрината и љубовта.
Посебен дел од експозицијата ќе биде „Скрипториумот“ — тивок агол кој ја пресоздава атмосферата на древна книжевна работилница и потсетува на вредноста на трпението, трудот и силата на словото.
Во деновите на одржување на изложбата ќе биде организирана и добротворна изложба-продажба на производи од манастирските работилници. Посетителите ќе можат да купат рачно изработена керамика, икони, книги, производи за убавина и здравје, како и манастирски послужувања. Средствата собрани за време на саемот ќе бидат наменети за поддршка на социјалното и добротворното служење на манастирот „Св. Елисавета“.
На следната видео снимка е кратко претставување на една од манастирските работилници.
