Фотографија: sueddeutsche.de
Во градот Минхен, во Германија, денес се одржа „Маршот за живот“. Овој настан кој се застапува за правото на живот, се одржува веќе неколку години по ред, а зад него стои организацијата „Гласот на безгласните“.
Освен во Минхен, слични „Маршеви за живот“ се одржуваат неколку години наназад и во други градови на Германија, како Берлин и Келн, а првиот ваков настан е одржан во 2002 година.
Поддршка за настаните даваат различни христијански верски заедници, како и невладини организации.
Поздравно слово за овогодинешниот Марш за живот во Минхен, упатија двајца бискупи на Римокатоличката црква, бискупот на Пасау г. Штефан Остер и бискупот на Ајхштет, г. Грегор Марија Ханке, чие обраќање го пренесуваме во целост:
Почитувани учесници на Минхенскиот марш за живот,
драги сестри и браќа,
Многу сум задоволен што денеска се собравте во Минхен за да се застапите за достоинството на сите луѓе и нивното безусловно право на живот.
Нашата посветеност на животот се заснова, од една страна, на нашето верување во воплотениот Бог, затоа што сме длабоко убедени дека секое човечко суштество е посакувано од Бога и е бескрајно вредно според Божјиот образ.
Во исто време, грижата за заштита на животот е и предуслов за човечкото достоинство и за сите човекови права, кои се апсолутно заштитени со уставот, како што потсети Римската Дикастерија на верата на почетокот на оваа недела.
Документот „Dignitas infinita“ зборува за бескрајното достоинство на човечкото суштество и нагласува дека „дури и во наше време мора да се каже со сета сила и јасност дека оваа одбрана на неродениот живот е тесно поврзана со одбраната на секое човеково право . […] Кога ова убедување ќе падне, не остануваат цврсти и трајни темели за одбрана на човековите права; тие тогаш ќе бидат предмет на случајната полезност на оние што се на власт“ (Dignitas infinita 47).
Со години – и сега повторно оваа недела – во нашата земја гледаме обиди за реинтерпретација и поткопување на Уставот и јасната судска пракса на Уставниот суд за заштита на неродениот живот.
Во оваа ситуација, мораме да бидеме особено внимателни нашата уставно потребна и христијански мотивирана кауза да не биде киднапирана од групи кои ја инструментализираат заложбата за заштита на животот за други политички цели кои ние ниту како слободни демократски граѓани ниту како верници христијани не можеме да ги одобриме.
Затоа би сакал многу да ви се заблагодарам за вашата храбра посветеност јавно да дадете пример овде денес како граѓани за човековите права, за нашиот устав и за неподеленото право на живот.
