Фотографија: euronews.com
Илјадници противници на абортусот протестираа во полскиот главен град Варшава против плановите на новата влада на премиерот Доналд Туск да ги ублажи строгите закони во земјата, односно да дозволи абортус до дванаесеттата недела од бременоста.
Во Полска, која е претежно католичка, прославата на крштевањето и Маршот за животот традиционално се одржуваат на 14 март. Католичката црква ги повика верните преку овој марш да го изразат својот протест против плановите на новата влада.
Полската католичка црква го поддржа маршот организиран од движењето против абортусот, кое првенствено е демонстрација за животот и семејството, вера и лојалност, но и за слобода и независност.
Во маршот учествуваа семејства со деца. Учесниците вееја бело-црвени знамиња и држеа шарени балони и транспаренти со натпис „Да живее Полска“.
Во тек е јавна дебата за чекорите што новата влада ги презема за да ги ублажи строгите закони наметнати од нејзиниот конзервативен претходник. Минатата недела полскиот парламент, во кој доминира либералната владејачката коалиција, гласаше за понатамошно развивање на четири предлози за укинување на забраната за абортус.
Конзервативниот претседател Андреј Дуда, кој има уште една година од функцијата, се очекува на крајот да го отфрли процесот.
