Фотографија: ziarullumina.ro
Романскиот Патријарх Даниил во понеделникот го освети параклисот посветен на Свети Андреј во парламентот на Романија.
По богослужбата на осветувањето, Патријархот Даниил се осврна на постоењето на параклиси во различни парламенти ширум светот, во аеродромите, во близина на болниците или на други јавни простори. Патријархот Даниил ги опиша овие простории како „извори на мир, радост и надеж“.
Посветен на Свети Андреј Првоповикан
Патријархот потсети дека Државниот совет, а подоцна и Домот на пратеници своевремено биле сместени во непосредна близина на митрополитската катедрала.
Во моментов, Парламентот на Романија се наоѓа во непосредна близина на Соборниот храм кој е посветен на Вознесението Господово и на Свети Андреј, првоповиканиот апостол, заштитникот на Романија.
„Од оваа причина, предложивме Свети Андреј да биде светителот-покровител на параклисот во романскиот парламент, кој усвои резолуција во 2012 година со која го прогласи празникот на овој апостол за неработен ден.“
Симбол на заедништво и на одговорност
Патријархот Даниил рече дека осветувањето на параклисот во романскиот парламент има посебно духовно значење: „Тој ја истакнува врската помеѓу молитвата и заедницата, меѓу богослужбата и културата, вклучително и политичката култура, меѓу институционалната активност и општеството, помеѓу индивидуалната слобода и општествената одговорност“.
„Во сè повеќе секуларизираниот свет, осветениот литургиски простор кој повикува на молитва ни помага повторно да ја откриеме вистината дека човекот е повикан на светост, во заедница со Светиот Бог и во понизно служење кон другите луѓе, бидејќи индивидуалната и заедничката молитва е извор на мир, радост и надеж“.
„Го молиме Бога да ги благослови иницијаторите и поддржувачите на овој проект“, рече патријархот Даниил, говорејќи за вршителот на должност Претседател на Домот на пратеници, Алфред Симонис, генералниот секретар на Комората Силвија-Клаудија Михалчеа и архимандритот Нектариј Софелеа, егзархот на манастирите во рамките на Букурешката архиепископија.
Патријархот Даниил подари неколку литургиски книги за новоосветениот параклис.
Романскиот премиер: Духовноста има клучна улога во нашиот секојдневен живот
„Имам особена чест да учествувам денеска во историски момент, обележан со осветувањето на православниот параклис во романскиот парламент од страна на патријархот Даниил, чија посветеност, истрајност и неуморна енергија во постигнувањето на општото добро секогаш ме инспирираа и ми ја даваа привилегијата на искрена соработка, фундаментална за доброто на целото романско општество“, рече романскиот премиер Марсел Чолаку на церемонијата на осветувањето на 25 март.
„Во свет каде што традиционалните верувања и вредности често се ставаат во втор план, овој параклис е доказ за клучната улога што духовноста ја игра во нашиот секојдневен живот“, истакна романскиот премиер.
„Овој параклис не е само место на мир и засолниште пред секојдневните предизвици и тензии, туку и симбол на нашата посветеност на националните вредности. Се надевам дека овој свет простор ќе ги инспирира и зајакне сите што ќе го преминат неговиот праг, носејќи светлина и мудрост во нашето заедничко патување за доброто на целото општество“, додаде тој.
Како започна
Воспоставувањето место за богослужба во романскиот парламент претставува постара иницијатива. Најновото соопштение беше објавено минатата есен на настанот по повод 30-годишнината од формирањето на Молитвената група во романскиот парламент.
Иницијативата се оформи на 11 март 2024 година, кога беше одобрен меморандум за утврдување на соодветен простор за параклисот. Исто така, беше одредено дека овој параклис нема да има постојан свештеник, туку дека Архиепископијата на Букурешт и Романската патријаршија ќе ги координираат литургиските активности.
Фотогалерија од осветувањето: https://ziarullumina.ro/galerie/patriarhul-romaniei-a-sfintit-capela-din-incinta-palatului-parlamentului-289714.html
Извор: ziarullumina.ro, преку: https://orthodoxtimes.com/patriarch-of-romania-consecrates-chapel-dedicated-to-st-andrew-inside-romanian-parliament/
